悠閒日誌

Shirleyyau Y!BLOG正式啟用

2007-01-19T12:24:00.000+08:00

特別通告:

我響YAHOO開嘅BLOG已正式開始運作啦，有時間就過去坐吓啦，不過唔好唔記得依個BLOG呀，兩個BLOG會同時運作架...^_^

http://hk.myblog.yahoo.com/jw!2Kyn8CyFGA6sAWqLtw--

賭場小插曲

2007-01-18T17:30:00.000+08:00

1月14日下午在亞堅家與DIY友短聚後，隨即搭車到中港城搭船過澳門出席朋友的婚宴。既然來到澳門，當然不少得到賭場玩玩，15號下午響漁人碼頭食過lunch後，便行過隔鄰嘅金沙賭場碰碰運氣，當然只係小賭，賭得大我都唔捨得啦...^_^

玩咗大約4個鐘頭，大約輸咗1000大元，按照計劃我同老公打算在賭場留到晚上8點就離開行過去碼頭搭8:30嘅新渡輪返港，但我在臨離開前究發生咗一段小插曲，令我搭唔到8:30班船。事緣，玩最後一鋪大細時，其中有一個女人唔記得自己落咗200元注買小，在開骰盅前佢將其中一個已放到買小嘅100蚊籌碼轉到買大，結果當然係開小啦，到荷官賠錢時，100蚊同200蚊嘅落注人數既然唔啱數，有4個人買咗100蚊，其中1個就係我，但檯上只有落注100蚊嘅就只得3個，荷官即時通知經理，經理即時與上面控制室聯絡，再翻查cctv，所有籌碼和賭枱都唔郁得。當時已經係8:05分，我已第一時間同個女經理講我要趕住搭船，但佢哋搞搞一下都已經8:15，我都已經趕唔切啦，所以我要求賭場賠償我2張船飛嘅損失。女經理原本死都話唔得，後來我要求同佢上司講，佢個葡籍女上司起初都話冇得賠，但最後因為佢敵唔過我嘅堅持，最後佢同佢嘅葡籍男上司講，依位男士終於答應幫我出番2張9:30嘅船飛畀我作賠償，而且仲係TurboJet，價值比新渡輪貴。

哈哈哈...今次雖然輸咗錢，但可以響金沙攞到2張船飛，我都當係贏咗架啦...^_^

遲來的報道 : 14/1DIY友BBQ聚會

2007-01-18T17:25:00.000+08:00

期待已久的DIY友BBQ聚會終於來臨，由於第一次跟大班網上認識同時又熱愛自家整餅嘅朋友見面，當然心情有d緊張，但因為我當日下午要搭船過澳門出席朋友嘅婚宴，所以只能跟大家來個1-2小時嘅短聚。雖然食唔到大家精心炮製的各種BBQ美食，但有機會食到亞堅整的Tenderness、蛙蛙和綠萼等人合力製作嘅無花果合桃蕎麥包、y.c.帶來嘅日式沙律，以及achan整嘅醎牛脷，差d唔記得仲有on_on煲嘅白果腐竹糖水，總算有少少口福。

第一次見面，當然唔少得見面禮啦，"得意薑餅人"就係我為大家準備嘅見面禮，人人有份，永不落空。另外，我又整咗藍莓乾燕麥曲奇畀大家試吓。

藍莓乾燕麥曲奇送抵亞堅家後，放在靚靚銀碟上，再加上白板、竹簾和伯爵茶嘅襯托，即時靚晒...

到亞堅家第一樣食到嘅美食就係亞堅整嘅Tenderness，第一次食這款西式小吃，唔...好味道，真係好想再食呀...

蛙蛙、綠萼、maymok、藍藍及亞堅即場合力製作嘅無花果合桃蕎麥包，真係好香軟、好好味呀...所以我已經劫走咗一個包包啦...heheheheeeee

期待下一次嘅聚會~~

2007年開爐作--Classic Chocolate Gateau

2007-01-04T10:03:00.000+08:00

依個古典朱古力蛋糕係跟亞堅嘅食譜整，其實早幾個月前已經買咗黑朱古力打算整依款蛋糕，只不過一直都未有動手做。第一次整依款蛋糕，適逢2007年元旦，整嘅時候真係好緊張、好小心，因為怕今年一開爐就失手，唔好意頭嘛...^_^ 不過好彩最後都成功做到，我唯一唔滿意嘅係，蛋糕中間下陷程度不足，以致整個蛋糕嘅賣相唔係太靚。至於味道方面...唔...好香渨嘅朱古力呀，少少苦苦哋，好~~好~~味~~呀~~~~

2006年收爐作--"堅版"薑餅人曲奇

2007-01-02T09:35:00.000+08:00

我嘅DIY整餅生涯由2006年3月左右開始，經過咗大半年嘅實習，雖然整包餅嘅技術仍屬幼稚園BB班階段，尚有很多很多改進空間，但從中我卻得到唔少滿足感，不單只可以為伴侶和家人親自製作包餅嘅關係，同時亦因為認識到你哋一班DIY友，令我響整包餅嘅路途上得到不少支持和鼓勵，亦因為認識咗你哋而令我獲益良多。在這我要同你哋講聲:多謝!

2006年我嘅最後製作係"堅版"薑餅人曲奇，今次係跟亞堅嘅食譜製作，製成品和較早前做的明顯不同，今次焗出來的曲奇較脆、較硬、顏色較啡黑、味道較香濃，同時亦因為得到亞堅的指點，所以用咗蛋白糖霜做裝飾，今次真係睇得又食得...^_^

再來"靚靚得意版"薑餅人

2006-12-20T10:15:00.000+08:00

昨晚放工返屋企食完飯又再焗薑餅人，連續3晚都係用同一個麵糰來焗，大前日焗出來嘅係"失敗版"，前日焗出來嘅係"靚版"，昨日焗出來嘅就加更係"靚靚得意版"，完來幫薑餅人扮靚裝身係會上癮架，我昨晚幫d人仔扮靚扮到都唔知時間過得咁快，望下個鐘已經凌晨1點啦，真係快活不知時日過。不過我都好滿意昨晚為薑餅人創作嘅新形象，其中仲有一家四口共渡歡樂聖誕添...^_^

祝大家聖誕節快樂!!

一家四口去睇聖誕燈飾啦~~

裝身後的"靚版"薑餅人

2006-12-19T10:47:00.000+08:00

前日整薑餅人時留咗2/3麵糰響雪櫃留番昨晚放工返屋企後再焗，汲取前日焗薑餅人嘅經驗，雖然昨晚和前日所造嘅薑餅人都係來自同一麵糰，但昨晚我特別有小心睇火，所以焗出來的薑餅人顏色金黃，恰到好處，見到d人仔顏色咁靚，自然我都有心情為佢哋扮靚靚。

你哋睇吓，經過用糖霜裝身後嘅薑餅人真係靚咗好多呀，靚到我都唔捨得食添...^_^

不過，唔知係咪我調較糖霜時嘅水份太少，所以糖霜加水後比較杰，我只可以好似整泥膠咁，用手將糖霜搓好後才放上薑餅人身上。我都唔知咁整啱唔啱架，我只知道最後可以成功為人仔扮靚靚，咁我就好開心啦...^_^

薑餅人(失敗版)

2006-12-18T11:32:00.000+08:00

昨日第一次整薑餅人，不過由於焗嘅時候已睇到薑餅人仔有少少溶化跡象，可能牛油份量較多(250g)，加上無睇火以致焗到表面顏色偏深，食落口感好鬆脆，一d都唔硬，所以我覺得今次算係失敗之作。

材料: 無鹽牛油 225g / 蛋 1隻 / 幼黃糖 100g / 麵粉 250g / 梳打粉 1茶匙 / 鹽 0.25茶匙 / 泡打粉 0.5茶匙 / 薑粉 2.5茶匙 / 玉桂粉 0.5茶匙 / 豆寇粉 0.5茶匙 / 雲呢嗱香油 1.5茶匙

因為焗出來的效果唔理想，所以我都無心機再為薑餅人仔加任何裝飾~~

monchhichi陪你過一個白色聖誕

2006-12-12T12:24:00.000+08:00

聖誕節就到啦，如果你同我一樣唔可以親身響雪地上過一個白色聖誕，不如去海港城join埋monchhichi一邊滑雪一邊慶祝聖誕，下年有機會再同自己嘅honey一齊飛出香港過一個白色聖誕啦。

帶齊裝備可以出發啦~~

熱情鬆餅

2006-12-08T15:53:00.000+08:00

由於一大碗熱情果汁放咗響雪櫃差唔多2星期啦，其實都唔知d熱情果汁放唔放得咁耐，所以昨晚用咗一半來整熱情鬆餅。今次焗出來嘅效果比之前用熱情果汁來整小蛋糕嘅效果好，不過就唔及小蛋糕香，同時食落亦冇小蛋糕咁有少少酸酸甜甜嘅味道，等我下次整鬆餅時用多d熱情果汁代替牛奶嘅份量，睇吓焗出來會唔會香d好味d。

熱情鬆餅(8個中型紙杯份量)

材料:
麵粉 270g
糖 100g
泡打粉 3tsp
鹽 3/8tsp
蛋 3隻
牛油溶液 82g
牛奶 75g
熱情果汁 100g
雲喱拿香油 1tsp

做法:將蛋打散後加入牛油溶液、牛奶、熱情果汁及雲喱拿香油攪匀，然後拌入已篩過嘅麵粉、糖、泡打粉及鹽，將麵糊倒入紙杯，再放入已預熱焗爐用200度焗23分鐘，焗好將鬆餅留在焗爐內5分鐘後才取出放涼。

( 哎呀...我打打吓個食譜才發現，原來我唔記得將牛奶同熱情果汁嘅份量加大，因為原食譜係用2隻蛋嘅份量，但我就3隻蛋份量，其他所有材料我都記得加大，唯獨牛奶同熱情果汁嘅份量就唔記得加大，唔怪得拌匀所有材料後嘅麵糊比較"杰"啦。真係失策啦~~~ )

化痰止啖--龍利葉石黃皮蚌花瘦肉湯

2006-12-06T16:21:00.000+08:00

雖然星期一煲咗花旗參無花果豬展湯，但因為老公依兩日有痰又有兩聲咳，唔知花旗參湯啱唔啱佢飲，所以寧願煲過d化痰止咳湯水畀佢飲。

響網上搵咗資料後，原本打算煲龍利葉無花果瘦肉湯，所以放工就去咗花墟嗰間財記買新鮮龍利葉。點知去到見到除咗龍利葉外，原來仲有其他幾種材料都有化痰止咳功效，鋪頭阿姐又話可以幾種材料一齊煲，所以我最後就聽阿姐話用$20買咗3種材料，包括新鮮龍利葉、石黃皮和新鮮蚌花，3種材料係阿姐隨意執，故當時我都唔知究竟3種材料各自嘅份量係幾多。不過，我返屋企都有分開3種材料磅過，詳情如下:

龍利葉石黃皮蚌花瘦肉湯
材料：新鮮龍利葉 92g / 新鮮蚌花 92g / 石黃皮 174g / 蜜棗 8粒 / 南北杏 10g / 瘦肉 $15 / 水 2.5L

右邊一粒粒嘅就係石黃皮，而左邊紫紅色好似朵花咁嘅就當然係新鮮蚌花啦。

花旗參無花果豬展湯

2006-12-06T15:58:00.000+08:00

因為買咗個真空煲，所以令到我更加的起心肝煲多d湯水畀自己同老公滋潤下。今個星期一就煲咗依款簡單易煲嘅秋冬滋潤湯水-花旗參無花果豬展湯。

材料: 花旗參 2湯匙 / 無花果 5粒 / 豬展 $20 / 水 2.5L

做法: 先洗淨所有材料，花旗參用半碗水浸15分鐘，豬展用熱水拖一拖，煲滾2.5L水後放入所有材料，浸花旗參嘅水亦一齊放入煲內，再滾30分鐘後離火，放入真空煲內，因用真空煲不能用大火，所以全程用中火煲。到飲時從真空煲取出內煲，稍加熱及加入適量鹽便可飲用。

由於晚上11點左右才放入真空煲，到第二朝起床煲湯已經煲好，而且仲係熱，所以無需加熱就已經可以飲。真空煲真係好用呀...^_^

買真空煲送保暖杯及手製陶瓷煲

2006-12-01T10:46:00.000+08:00

昨日先施開始首天VIP減價，所以放工就去咗西九龍中心間先施睇吓有無筍嘢執，結果買咗差唔多成千蚊嘢，最貴就係依個$888嘅Thermos 4.5L真空煲，依家買仲送一個直徑約7吋、高4.5吋嘅手製陶瓷煲及0.5L保暖杯。其實之前好耐都想買個真空煲，主要想煲多d湯飲，今次減價又有嘢送，所以就即刻買返屋企...^_^

清新感覺~~熱情小蛋糕

2006-11-29T18:00:00.000+08:00

終於用咗d皺皮熱情果來整蛋糕啦，昨晚用咗2個熱情果取汁(約45g)來整小蛋糕，可能熱情果放耐咗真係會甜d，一切開已經傳來一股香噴噴嘅果香，香中又帶少少酸，酸酸甜甜嘅感覺真係好特別喎，難怪咁多diy友都對熱情果情有獨鍾啦。

唔...蛋糕賣相雖然差咗少少，但食落個蛋糕軟綿綿，又有種香甜清新感覺，真係好feel呀~~~

跳完Funky Dance成個人散晒啦~~

2006-11-27T11:49:00.000+08:00

昨日去咗學人跳funky dance，第一次試堂跳到唔知似乜，但係為咗做多d運動，鍛鍊體質兼修身，辛苦d都要啦。Funky Dance嘅運動量真係好大，跳完1.5小時後，我由內至外全身濕透，未跳完都已經覺到部份肌肉有扯緊嘅感覺。由於我第一次跳，加上好耐無做運動同埋並無舞蹈底子，所以昨日試堂時很多舞步和動作都跟唔上，不過導師話個個新同學都係咁，初初跳時會唔知自己跳乜，但跳多幾堂就可以跟得上。我昨日跳完已經攰到唔係好想郁，今日訓醒時就更加周身肌肉酸痛，簡直唔想起身返工。雖然係咁，但為咗可以有多d運動同修身，我之後會繼續跳funky dance嘅，將來修身成功再話曲大家知啦...^_^

跳完funky dance返到屋企已經好攰，但自己又手痕想整餅，所以夜晚就整咗簡簡單單嘅雙層朱古力鬆餅來慰勞自己。

皺皮熱情果

2006-11-27T11:18:00.000+08:00

上星期四lunch time響界限街近太子地鐵站一個蔬果檔買咗$20熱情果，當時檔口老闆教我揀d較深色嘅，買返屋企後再放2-3日等佢皺皮後就會較甜較好食。果然，買返屋企後放咗3日，果香越來越濃，果皮亦一日比一日皺，相信依2日都係時候用來整熱情果蛋糕啦。由於未買雪芳蛋糕模，所以我只會整熱情果鬆餅，整好再post上來畀大家睇下啦...^_^

較酸的新鮮熱情果(11月23日)

較甜的皺皮熱情果(11月26日)

秋冬滋潤湯水--雪梨茶

2006-11-22T14:32:00.000+08:00

近排天氣轉涼，而且有時都幾乾燥，早排每日起床都覺得比較乾，仲好似有少少流鼻血咁，響依d咁嘅天氣最好緊係煲返d滋潤嘅雪梨茶飲下啦。咪以為我好有經驗呀，未結婚前同阿媽住時都可以經常飲到阿媽煲嘅雪梨茶，不過結婚後，做咗"無飯主婦"後，今次只係第一次煲咋，雖然煲雪梨茶並唔複雜，但由於第一次煲，諗住煲多少少可以留返幾日飲，所以落多咗d水(7個天津梨+15杯水)，結果煲雪梨水略為清淡咗d，不過飲飲下又覺得幾有雪梨味喎...^_^

真係好啦，有得飲又有得食。

的起心肝煲靚湯~~

2006-11-16T14:15:00.000+08:00

近排天氣轉涼，濕度偏低，以致皮膚較乾燥，係時候煲返D秋冬湯水補返下。繼日前煲過猴頭菇鯊魚骨湯後(係以前買咗未煲嘅湯包黎架...heheheeee)，昨晚就煲咗沙參玉竹鮑魚螺片湯，依款湯水完全係我個人創作，將家中餘下嘅煲湯村枓混合而成。其實我都唔知依d材料配搭啱唔啱架，不過煲咗2個半鐘後試味，原來個湯都好清、好鮮甜喎，大家不妨試試...^_^

材料：沙參 40g / 玉竹 40g / 碎鮑片 15g / 螺片 2塊(66g) / 圓肉 15g / 豬展半斤 / 水 15杯

另外，由於昨晚只得自己一個"食自己"，所以除咗煲湯外，我就只係煮咗個即食麵填飽個肚就算。過往我只會食兩款即食麵:出前一丁及公仔麵，不過我昨晚就試咗新嘢，就係出前一丁中華生麵，依款麵強調"不經油炸"，故吸引我買來試吓。食落都幾好味喎，麵身幾爽，感覺幾健康。
(蛙蛙&八八，現誠意推介你哋試吓...^_^)

出前一丁中華生麵-蠔汁鮑魚味

豆腐紅豆芝士蛋糕

2006-11-06T11:21:00.000+08:00

剛過去嘅星期日整咗我人生第三次為他人整嘅生日蛋糕，由於今次嘅主角係我舅公，所以我打算整個較健康、適合老人家食嘅生日蛋糕畀佢。依款蛋糕由4層組成，由上而下順序係豆腐芝士、紅豆芝士、清蛋糕及碎餅底。

由於第一次整依款蛋糕，所以之前我響網上搵咗好多資料，再根據網友提供嘅心得，決定用街市賣嘅布包豆腐做豆腐芝士餡。不過唔知係我技術差定係做嘅過程出錯，做出來嘅豆腐芝士餡明顯呈細粒狀，外表見唔夠平滑，食落亦唔夠幼滑。不過好彩嘅係，反應都算唔錯，我表舅父仲話得喎，好食喎，佢仲留咗件蛋糕做佢第二朝嘅早餐添。

貓貓:你訓覺個樣好得意呀!

2006-11-06T10:57:00.000+08:00

你睇下依兩隻貓貓訓覺個樣係咪好可愛呢!好似一面訓一面笑咁，唔知係咪因為訓得好舒服呢。真係好得意呀...^_^

大家唔好誤會，依隻唔係大頭貓，只係拍攝角度影響咋。

遲來的"Hello Kitty冰皮月餅"

2006-11-01T10:26:00.000+08:00

仲記得7仔響中秋前曾經賣過一set DIY Hello Kitty冰皮月餅預伴粉連膠模嗎? 我做facial間美容院嘅幾個美容師話買咗番屋企都整唔到，加上佢哋話想再食我整嘅冰皮月餅，所以其中一個美容師就借咗個模畀我，叫我整D Hello Kitty冰皮月餅畀佢哋食。

雖然中秋節已經過咗3個多星期，不過正所謂"十月都係拜年時"，所以只要你想食而自己又可以整到的話，咁就幾時都可以食月餅啦...^_^

簡單易做--蒸釀冬菇

2006-10-26T14:55:00.000+08:00

任何菌類我都非常鍾意食，小時候每逢過節，媽咪總會炆一大煲冬菇，因為知道我鍾意食丫嘛...^_^

前日響超市買咗兩盒鮮冬菇，昨晚響街市買咗d鯪魚肉返屋企整釀冬菇。我記得以前媽咪曾經用蒸嘅方法整依味餸，蒸完d冬菇再淋少少豉油熟油響面，真係好好食架。所以昨晚我照樣用蒸嘅方法整魚肉釀冬菇，不過蒸熟後就無淋上豉油熟油，原來咁樣都已經好香好好食，大家都試吓啦...

第一次整香草焗魚扒

2006-10-20T15:48:00.000+08:00

昨晚得自己一個食飯，所以諗住整d簡單又健康嘅菜色，順便煮可少少可以今日帶返公司做午餐。由於平時少吃魚，加上好想試吓用焗嘅方法來煮，所以響凍肉鋪買咗一塊南美金鱈魚扒，返屋企解凍後加少少鹽和檸檬汁做醃料，之後將少少乾香草放響魚塊上，過一陣再將魚塊略煎以取色，之後用錫紙包好放入已預熱220度焗爐焗15分鐘就得啦...唔...魚塊未出焗爐時已聞到好香嘅魚味，食落味道亦唔錯呀...^_^

同場加影秀珍菇炒翠玉瓜...簡單易做又健康...唔...好味道...

有snoopy之稱嘅"比高犬"

2006-10-16T15:28:00.000+08:00

平時經過深水埗一間寵物店時，間中都會見到幾隻初生比高BB好可愛咁堆埋一齊訓覺，每次見到我同老公都會停下來睇一陣才走。最近又見到店內有4-5隻初生比高BB，上星期六經過時只剩下3隻，同店員姐姐傾傾下才知道原來其中2隻比高仔都已經有新主人啦，遲d就會跟主人返屋企玩，而另外的一隻比高女則仍待新主人嘅出現。於是我老公問店員姐姐可唔可以拿隻比高女出來睇下，店員姐姐話:當然可以啦。比高真係好活潑、好可愛、好得人鍾意，我哋後來仲幫佢影咗幾張肉照，你哋話佢係咪好得意呢...^_^

又到咗減肥嘅時候啦~~

2006-10-13T14:46:00.000+08:00

近日見到幾個網友都話減肥，佢哋主要透過控制進食嘅種類來減磅，我見佢哋嘅餐單都係無澱粉質同埋唔食甜品，生果亦係盡量避免，就算食都只係食西柚。昨晚我特別買咗一條茄子和一個黃椒，返屋企諗咗好耐都唔知點煮好，最後就好求其咁用咗一茶匙韓式醃醬來炒茄子和黃椒，原來味道都唔錯喎。跟住我再將老公昨日下午食剩嘅幾塊叉燒切粒，再加一隻蛋同之前整蛋糕時剩下嘅一個蛋白混合，結果就整咗一小碟叉燒炒蛋，依兩樣餸就作為我今日嘅午餐啦...^_^

韓式醃醬炒黃椒茄子+叉燒炒蛋

農曆8月16日清晨的月光

2006-10-09T15:19:00.000+08:00

雖然今年中秋節老公要返工唔能夠陪我，但我仍有一大班屋企人同我一齊過中秋。食過中秋晚餐後，有人攻打四方城，有部份人則乖乖坐著睇電視，雖然我無份打麻雀，但我仍坐著睇完幾套電影才走，走時已經4點幾啦，返到屋企見到個月亮真係好大好靚，於是立即影低畀大家睇吓...^_^

第三版--迷你冰皮月餅(紅豆茸&綠豆茸)

2006-10-06T11:39:00.000+08:00

趁迎月夜作最後衝刺，今次係今年第三次整中秋冰皮月餅，亦係今年最後一次。今次整咗紅豆茸同埋綠豆茸兩種味道，而且整嘅數量係最多，一共整咗21個。因為我打算拿給公司同事、我幫襯開嘅美容院friend及我娘家分享。可能之前已經累積咗少少經驗，所以今次整起來較之前兩次都順利同快。整好後我已經忍唔住口要即刻食番個...唔...好味道...^_^

芝麻冰皮月餅

2006-10-04T15:43:00.000+08:00

第二次整冰皮月餅，今次冰皮嘅材料同上次整奶皇冰皮嘅大概相同，唔同嘅只係將上次用嘅橄欖油改為白酥油(shortening)。因為貪方便所以只用無糖黑芝麻粉加糖、橄欖油及2湯匙脫脂奶拌勻做餡，不過可能係芝麻粉質地較粗，所以食落去個餡嘅口感比較粗鞋，除口感不夠幼滑外，整體味道都尚算可以。

"鬥雞眼"肥貓

2006-09-23T11:15:00.000+08:00

早排經過旺角一間寵物店，見到響門外玻璃櫃內有一隻肥嘟嘟嘅貓懶洋洋反肚咁訓咗響度，於是同老公走入去睇吓依隻肥貓嘅得意訓覺樣，入到去望真d，原來隻貓唔單只反肚訓，仲係"鬥雞眼"同埋好似加菲貓咁半開合眼添，個樣真係好搞笑呀~~

即沖即飲--中藥配方顆粒

2006-09-23T10:49:00.000+08:00

因為近排訓得唔係咁好，所以昨日去咗工人醫療所睇中醫，起初都驚唔知係咪要執藥返屋企自己煲，一來我自己唔識煲藥，二來我屋企亦無適合嘅藥煲用來煲藥。不過原來依家食中藥唔一定要煲，可以選擇取走獨立包裝嘅中藥配方顆粒，返屋企跟住指示用一碗熱水開來飲就可以。現成嘅中藥配方顆粒沖熱水後用火煲嘅中藥無乜分別，顏色一樣咁烏卒卒，味道一樣係咁苦。大家日後唔想煲藥都可以考慮服用中藥配方顆粒啦!

叉燒醬焗雞翼

2006-09-22T12:42:00.000+08:00

之前試過用叉燒醬醃雞翼，味道真係非常好，我老公都好鍾意食。昨晚我又再用叉燒醬同其他調味料醃咗D雞翼，再放入焗爐焗30分鐘，期間我攞出雞翼翻轉時，再響雞翼兩面掃上叉燒醬汁，焗完出來更加好味道呀...^_^

My Birthday Cake

2006-09-18T10:41:00.000+08:00

哈哈...剛剛過咗我人生中第N個生日，原本打算自己整個生日蛋糕給自己，因為唔想破費買生日蛋糕。不過由於時間上配合唔到，所以最後都冇整到。雖然自己冇整到生日蛋糕，但原來我老公襯我唔知嘅時候，竟然走咗去買咗個鋼琴形狀嘅雪糕蛋糕給我慶祝生日，真係好開心呀，因為我冇諗過老公會送個生日蛋糕給我，而且佢係響我生日前一晚10點左右才拿回來，等到夜晚12點整，一踏入我嘅生日，佢就同我切蛋糕慶祝，今個星日真係過得開心...^_^

新鮮蛋撻出爐啦~~

2006-09-18T10:20:00.000+08:00

前一晚才整完藍莓鬆餅，訓醒覺後又手痕痕想整第二樣嘢，於是響大埋食譜入面搵來搵去，最後決定試吓跟食譜整好多人都鍾意食嘅--蛋撻。其實之前都聽過朋友講蛋撻好容易整，今次試做，我發覺原來真係幾易整喎，當然容易整唔代表一定整得好食，因為我第一次嘅作品蛋漿部分較為硬咗少少，唔夠幼滑，可能因為個蛋漿較難焗熟，同埋我掌握唔到焗嘅時間，所以令到個蛋漿硬咗少少，不過我覺得第一次整都算過得好啦...^_^

又再"藍莓鬆餅"

2006-09-18T10:13:00.000+08:00

雪櫃入面有一盒藍莓餡就快過期，所以拿拿淋用來整鬆餅，務求盡快消滅快過期嘅藍莓餡。

冰皮月餅--第一次試做

2006-09-09T10:15:00.000+08:00

好耐無整餅同包包啦，響過去3個星期我主要埋頭苦幹響網上四處搵冰皮月餅嘅食譜同做法，當然唔少得搜集各位網友整冰皮月餅嘅心得啦，因為我打算今年親自製作冰皮月餅。終於昨晚我第一次試整咗8個冰皮月餅，冰皮同奶皇餡都係自己親手整，總共製作時間約2個半鐘，製法並不算繁複，整個製作過程大致順利。由於係試做關係，所以我只用了果凍膠模做月餅模。我覺得製作過程中最困難就係壓模一環，我將餅糰放入膠模後，好難將餅糰擠壓到膠模嘅頂部，結果差唔多個個月餅脫模後，頂部嘅形狀都係唔完整嘅，唔知下次出去買個真正嘅月餅膠模來整會唔會好d呢?

雪咗一晚切開睇到都幾滿意，不過月餅底部冰皮似乎厚咗d，我諗下次要改良一下包餡嘅手法，唔駛整到個月餅皮底部過厚。咬咗一啖，唔錯喎，第一次整到似無似樣，味道都ok，依家雪櫃仲有d奶皇餡用剩，過兩日再試吓整d芝麻餡，實行一次過整奶皇同芝麻兩種味道~~

Strawberry Mousse Cake

2006-08-15T17:02:00.000+08:00

依個係我第2個親自整來送給人嘅生日蛋糕，因為我家姐個囝囝響8月13日剛剛1歲大，佢暫時仲有好多嘢仲未食得，所以我就整咗依個mousse cake給他，雖然佢仲未可以食mousse，但起碼可以食個cake入面嘅清蛋糕餅底部份。今次係我第一次整mousse cake，我覺得整得都唔錯，唯一可借嘅係唔知點解包住cake外圍，用來防止cake黏住蛋糕模嘅焗爐紙，收入雪櫃後竟然出現收縮現象，搞到個cake邊好唔平滑，令整個cake嘅外觀扣咗唔少分。

珠海海泉灣溫泉渡假村

2006-08-14T11:48:00.000+08:00

上星期10/8-11/8同老公去咗珠海海泉灣和澳門玩咗兩日，由於係旅行團關係，行程第一日日間主要去左一個叫”參之谷”嘅地方，但我哋依團嘅團友目的喺去浸溫泉，所以團友們聽完"參之谷"工作人員介紹人參和石斛之後就即刻走人，願意花錢買嘢嘅團友都冇乜幾個。我同老公就用咗$20食咗一盅雪耳石斛燉人參，響香港食一碗糖水都要咁上下價錢啦，我覺得花$20試吓都毋妨...

第二個行程就喺去雅居樂花園自費睇4D電影，我同老公同埋大部份團友都冇睇，咁我哋就響雅居樂花園周圍逛咗約30分鐘，等埋其他團友睇完就走。

終於都去到海泉灣，但時間都已經喺下午4點幾啦。首先導遊帶我哋響海泉灣行一圈，等我哋知道各設施嘅位置，行咗約15分鐘左右就行完，之後我哋就各自到房間休息，等到6點就去享用我哋嘅晚餐--湖畔BBQ。領隊話唔想團友日洒雨淋同埋比蚊針，所以所謂嘅"湖畔BBQ"會安排響室內進行，至於BBQ就唔駛我哋自己燒，所有食物會由廚師燒去給我哋食，就好似平時食Buffet咁。雖然食物款式和種類並不多，BBQ食品就更加少，但我覺得味道尚算不錯，環境亦很舒適。

海泉灣內其中一間海皇星酒店嘅房間

海泉灣日與夜景色

食完晚餐我同老公花咗$120(兩人共$240)去咗睇名為"海邊的夢"嘅Show，約90分鐘嘅表演真係很精彩，第一次睇show d seat位會轉架，當有表演者走到台下中間表演時，位於觀眾席前半部份的seat位就會轉動約90度角，方便我哋坐響依d seat位嘅觀眾繼續睇表演。整個show有歌舞表演、雜技、電單車、體操等，我覺得今次依個show真係值回票價。不過可惜表演場內嚴禁拍攝，所以未能同大家分享。

睇完show後我同老公就去咗浸溫泉，浸咗大約90分鐘都好攰啦，又喺要返房沖涼訓覺嘅時候啦。我覺得海泉灣嘅溫泉同北海道嘅溫泉唔同，好似唔多似溫泉水咁，總之就浸過啦，喺咪真正嘅溫泉就真係唔知啦。不過其中有兩個池幾值得介紹，一個喺死海鹽溫泉池，由於含死海鹽份很高，故浸響裡面嘅人都好容易就會浮起。另一個就係"親親魚"池，依個池嘅特點係池中有好多小魚，你可以坐在池邊的梯級，大約心口以下嘅部份會浸響水中，池中嘅小魚就會游埋你對腳附近，游游吓就會埋黎啜你對腳，幫你啜走對腳嘅死皮，感覺會有少少痕，有d女仔同小朋友都頂唔順依種感覺。可能我對腳冇乜死皮，所以唔係好多魚游埋黎啜我對腳，不過我老公好多時都會有一群魚仔啜住佢對腳，睇起來好得意呀。

第二日我哋中午食過飯才離開珠海前往澳門，旅行團亦響抵達澳門後解散。響澳門逗留咗大約7個鐘左右，我同老公大部份時間響金沙賭場內玩大細，好彩最終贏咗幾百蚊，總算搵番少少錢幫補今次嘅行程啦。另外我哋又去過漁人碼頭，逛咗一陣影咗幾張相就走咗啦。臨上船返港前當然要去醫肚啦，我哋去咗八佰伴附近一間茶餐廳食飯，之後就搭9:15船回港，珠海澳門兩天遊亦就此結束。

益力多果凍

2006-08-14T11:42:00.000+08:00

鍾意飲益力多嘅朋友一定會鍾意依款夏日消暑甜品--益力多果凍。依款果凍所有材料和做法都非常簡單，有興趣嘅朋友快d試吓親自整番d黎食啦~~

榛子曲奇

2006-08-04T16:15:00.000+08:00

原本打算用新買嘅動物曲奇印模整動物榛子曲奇，不過可能因為我太心急，未等嚿曲奇粉糰雪硬就攞出來印模，結果粉糰太軟啦，一印就黏住d粉糰響個曲奇模內，完成"dune"唔到出來，最後唯有用返最簡單方法用手"初"啦......

車打芝士包 (加料版)

2006-07-27T10:20:00.000+08:00

今次比上次加多咗一倍車打芝士餡，其中一個原因係想食落去芝士味更濃、更好味，另一個原因係要響d芝士就快過期之際，盡快將佢哋消滅，免得過期後益咗個垃圾筒...

keroro=snoopy???

2006-07-26T16:08:00.000+08:00

你哋睇唔睇到呀，明明正面睇到喺keroro，但點解響鏡中睇到背面會變咗喺snoopy，究竟發生乜嘢事呀~~~想親身睇吓依隻新品種，你響今個月底前去朗豪坊都仲可以有機會睇到架~~~

紅荳蛋白蛋糕

2006-07-20T16:58:00.000+08:00

之前整蛋糕用剩3個蛋白，諗咗好耐都唔知用來整乜東東好，有日忽然響網上搵到一個紅荳蛋白蛋糕，我見製作過程較簡單，而且蛋白蛋糕又比較健康，所以我就決定整依個紅荳蛋白蛋糕啦。由於整依款蛋糕係要座水焗，我用開嘅又係脫底蛋糕模，為咗減省包錫紙依個工序，所以我改用新買番來仍未拆封嘅四方不黏蛋糕模來焗。在蛋糕麵糊不多而四方蛋糕模較大的情況下，焗出來的紅荳蛋白蛋糕就只有1.5cm高，不過切開一件件來食，依個size食起來又幾方便喎...

紅荳飽

2006-07-20T16:41:00.000+08:00

今次係我第一次整紅荳飽，而且係跟一位網友提供嘅超軟甜包食譜製作。由於成整d較軟熟嘅包包，所以我決定用中種法製作，亦因為唔想整包整得太夜，所以我不單只用中種法，同時我亦用咗冷藏法製作，響第一次發酵後將麵糰排氣，跟住就將麵糰放入雪櫃待第二朝起身取出再做餘下工序。其實我都唔知咁樣又用中種又用冷藏法好唔好架，不過我覺得焗完d包包都好軟熟，我屋企人食過都話唔錯。

係咪見到焗盤左邊有一個包包特別冇加罌粟子呢...因為嗰個包包係特別為我家姐個囝囝整嘅，佢下個月中就滿1歲啦，佢依家只可以食d無餡包包，所以我就特別預一個無餡包包比佢囉...

包包未出爐已經傳出陣陣香味啦...由於今次第一次整紅荳包，所以唔敢放太多紅荳餡，下次一定要放多d，咁咬落去就會啖啖紅荳啦...^_^

時間緊迫下製作嘅--麵包布甸

2006-07-14T17:10:00.000+08:00

昨晚原本打算整藍莓麵包布甸給老公食,等佢食飽飽才返工...不過原來佢要先去朋友家攞嘢,之後才返工,結果我就只有70mins整依個麵包布甸...因為焗布甸都要45mins...餘下只有25mins給我準備材料和製作...所以最後就攪到我唔記得落藍莓醬啦...

玫瑰白葡萄味蒟蒻果凍

2006-07-13T10:57:00.000+08:00

上星期去完馬鞍山朋友家後，響新港城千色店買咗2包玫瑰白葡萄味嘅蒟蒻果凍粉返屋企，日前整咗1包試吓係乜味道，嘩...味道淡淡的，非常清新呀，真係好啱夏天食，我老公試過都話"正"。

車打芝士軟包

2006-07-11T11:45:00.000+08:00

昨晚第一次整有餡包包，由次之前在網上睇過整麵包和搓麵粉嘅示範片段，所以今次搓麵粉時明顯有進步，不過我搓咗差唔多一個鐘，始終都唔能夠搓出薄膜，雖然未有薄膜，但我見d粉糰好似好軟熟咁，於是我決定唔再搓並進行第一次發酵.....

可能天氣熱嘅關係，第一次發酵約30分鐘已經脹大咗2倍啦，大約45分鐘就完成發酵，睇吓...麵團表面突起咗一個個好大嘅氣泡呀...

完成所有發酵、包餡和整形過程，包包終於入爐啦，你睇吓d麵包個個脹卜卜，望見好得意呀...

食得啦...食落果然真係好軟喎...雖然包包入面嘅紐西蘭車打芝士味道唔夠香濃，但食落整個口感都唔錯，我對今次嘅作品都非常滿意。 ^_^

可能包包用直接法整嘅關係，昨晚包包出爐時食落好軟熟，今朝食嘅時候已經無咁軟熟啦，不過放入微波爐叮咗10秒再食，包包又會變番好軟熟架啦...

一個不完美的結局~~

2006-07-10T14:53:00.000+08:00

昨晚我同好多人一樣，寧願訓少幾個鐘，都要起身睇世界盃冠軍戰--法國對意大利。的而且確，昨晚兩隊嘅表現非常出色，尤其是法國隊嘅施丹一直都打得好好，可惜響加時嘅時間，唔知點解係踢到咁火爆，竟然做出一個好無體育精神嘅動作，向意大利隊一個球員使出一招"頭錘頂心口"，將個意大利球員撞跌落地，結果被紅牌趕出場。
辜勿論之前該名意大利球員向施丹講咗d乜嘢，係咪極具挑釁性，其實施丹都唔應該咁易動粗。況且，今場係施丹退休前嘅最後一場波，對施丹本人同球迷都有一個特別嘅意義，施丹今次嘅一時之氣，換來的，就只有佢球員生涯嘅一個不完美結局，見到一個咁嘅結局，相信好多人都會同我一樣，不禁為依個一代球王嘆氣......

消暑飲品 - 檸檬薏米水

2006-07-10T14:44:00.000+08:00

我跟一位網友提供嘅食譜整咗依款既消暑，又有美白功效嘅飲品--檸檬薏米水，果然加左檸檬皮同檸檬汁落去d薏米水度，有一種好清新、好解渴嘅感覺，大家不妨試試!

香濃朱古力雪糕

2006-07-10T14:30:00.000+08:00

上次第一次跟住個食譜整咗低脂藍莓乳酪雪糕，當時係唔需要打起d淡忌廉，而我又係第一次整雪糕，技巧當然欠奉啦，所以整出來的雪糕並唔軟滑，咬落去d雪糕入面會有d好似碎冰嘅物體，完全唔似食雪糕。今次依款朱古力雪糕係我第二次整嘅雪糕，而且係跟另一個食譜做，今次要將淡忌廉打起嘅，而我亦得到網友Candy嘅指點，將做法加以改良，結果今次整出來嘅雪糕有好大進步，不過雪糕嘅質感仍未夠幼滑，下層雪糕會比較硬，但比起第一次已經好好多...^_^

得意"伍長"電話繩

2006-07-07T15:21:00.000+08:00

近期keroro軍曹大熱，我都唔執輸走去買咗條giroro伍長電話繩，我覺得"伍長"面上有條刀疤好得意，所以我就買咗佢啦。雖然"伍長"同我之前一路掛開嘅靚靚水晶電話繩好似唔係好match，不過兩條掛埋一齊睇落又唔會覺得好怪喎......你話係咪?

終於都整到爆裂鬆餅啦~~

2006-07-07T14:45:00.000+08:00

之前整咗好多次鬆餅，大部份鬆餅嗰頂部都無乜爆裂feel，睇來睇去同街賣嗰d都係唔多似樣，似蛋榚仔多過似鬆餅。不過，今次跟住一個網友提供並聲稱由一個"鬼老"比佢嘅muffins食譜做，焗出來嘅muffins果然頂部爆開晒，外面脆內鬆軟，味道當然"正"啦...... ^_^

切開咗啦......

榛子朱古力蛋榚

2006-07-06T17:21:00.000+08:00

我跟住網友提供嘅食譜製作咗依款蛋糕，由於榛子粉嘅存貨唔足夠，所以依個蛋糕嘅榛子份量只係原食譜嘅3/5左右，不過最終味道仍算不錯呀~~

好介紹~~麵包製作示範片段

2006-06-27T12:23:00.000+08:00

我響網上見到依個網頁有麵包製作的示範片段，相信各位鍾意整包人士都會好有興趣，所以我將個網址post上來同大家分享下。

http://www.nisshin.com/life/komugiko_club/meikan/04/index.html

碎朱古力曲奇

2006-06-26T14:05:00.000+08:00

朱古力曲奇嘅吸引力真係好難抵擋，雖然我知道食曲奇好易肥，但你嘅朱古力味道又非常吸引，所以我對你實在又愛又恨~~

草莓芝士蛋糕

2006-06-26T13:57:00.000+08:00

送給我的美容師Brenda的生日禮物~~
Happy Birthday!

蛋糕剛出爐的樣子~~

加上裝飾後成個蛋糕即時唔同晒~~

低脂藍莓乳酪雪糕

2006-06-23T10:30:00.000+08:00

第一次自己整雪糕食，其實製法並唔複雜，但整個製作過程就需時較長，大概要4-5小時。唔知係我技術唔好定係用咗低脂淡忌廉，抑或個雪櫃太凍嘅關係，雪糕口感唔係咁軟滑，反而有d似食果汁雪條嘅感覺，雪糕質地較硬較實，總之雪糕未溶時就有d似食雪條啦...

用電子磅量準份量整嘅朱古力小蛋糕

2006-06-15T12:15:00.000+08:00

原本我打算整雙重朱古力小蛋糕，但臨尾入爐前我竟然唔記得放朱古力粒入麵糊，結果就無咗雙重朱古力啦。仲有呀...我用咗依隻黃色有少少膠質嘅小蛋糕杯直接載著麵糊入爐焗，而唔需要另外再用金屬模盛載，我買依隻蛋糕杯主要因為佢唔需要用金屬模載，但入爐後發現個蛋糕杯個杯口好似變得越來越闊，當時我真擔心d麵糊會否隨著蛋糕杯變型而溢出焗盤內，幸好最後都無發生，蛋糕亦可以成功出爐，大家可以比較下蛋糕杯入爐前和出爐後的形狀有何不同...

新增製餅工具

2006-06-15T12:03:00.000+08:00

依個電子磅我覺得都幾抵買呀，只需99蚊咋，雖然係made in china，但我覺得都幾好用，今後整餅份量可以更加準確啦!

同場加影-我的第一個整餅拍檔~~
依個焗爐係申請信用卡後唔駛任何簽帳下送嘅

自家製作--煙火腿片蟹柳PIZZA

2006-06-13T15:19:00.000+08:00

好早前已經買齊晒整PIZZA嘅材料，昨晚收工第一時間搭車返屋企整我同老公嘅晚餐。我睇咗好多網友嘅食譜及心得後，整咗我人生第一次自家創作嘅芝心批，材料分別有煙火腿片、蟹柳、菠蘿，同埋勁多芝士碎。雖然第一次整，加上自己貪心咗少少，用咗勁多材料來做餡，搞到個PIZZA變得漲卜卜，比起PIZZA店賣嘅PIZZA漲得多，相信以後整嘅PIZZA時都要幫佢哋纖吓體啦。不過，肥版PIZZA味道還算不錯，老公都讚好食，只係PIZZA皮較厚令外皮硬咗少少。整體來講，我對今次嘅創作都好滿意~~ ^_^

入爐前~~

有得食啦~~漲卜卜版PIZZA

製作簡單且美味的魚香茄子

2006-06-08T16:24:00.000+08:00

昨晚收工先去了荔枝角一間蛋糕材料鋪入貨，因為今個月除咗父親節外，我嘅美容師亦喺今個月尾生日，所以我今個月要準備整2個蛋糕，初步打算整一個Tiramisu和一個焗草莓芝士蛋糕。入完貨後經過街市見到一條條紫紅色嘅茄子，突然間就好想整番碟魚香茄子食，於是就響街市買咗茄子，再響超市買咗d免治豬肉同包裝嘅李x記魚香茄子醬料。

唔...真係睇得又食得...^_^

自己都幾滿意嘅Tiramisu~~

2006-06-05T16:56:00.000+08:00

今次係我第3次整Tiramisu啦，第1次整因為蛋白打得唔好，所有材料混合後整得太稀，搞到d手指餅浮晒上面，雖然食落都幾滑，但賣相就唔夠靚。第2次我用淡忌廉代替雞蛋來整，但今次就可能因為我座熱水打蛋黃時溫度過高，所以搞到d混合物變得粗身，唔夠幼滑。至於今次，我特別去賣咗半打比較貴嘅日本雞蛋來做，始終都係用雞蛋整比較香滑，而且今次打蛋白都可以打到企身，但唔知係咪因為最後將所有材料混合時攪得太耐或太高速，我見到d混合物由原來的很幼滑開始變得粗身，所以我即刻停手唔再攪d混合物，並隨即倒入盆內。雖然質地唔算好"鞋"，而且手指餅亦冇浮上面，但我相信下次應該可以整得更加滑嘅...^_^

放入雪櫃前嘅樣就係咁...見到表面唔係太平滑...

雪咗一晚並加上無糖朱古力粉後，終於可以試味啦...味道都唔太差喎...^_^

咖啡朱古力包

2006-05-30T14:37:00.000+08:00

上星期三放工響屋企用咗差唔多5個半鐘頭整咗依4個包包，因為用中種法做，所以等中種麵糰發酵都等咗2個幾鐘呀。可能因為我唔係好識搓粉，搓咗好耐都搓唔到薄膜，所以我響唔想整到三更半夜嘅情況下，只係將麵糰搓到唔黏手就攞去發酵，結果d包包出爐後放咗6-8個鐘左右就開始變硬，所以每個包食前都要叮10秒左右，待稍為變軟才食。

Dad's Birthday Cake--藍莓芝士蛋糕

2006-05-27T12:43:00.000+08:00

上星期六係我老豆生日嘅大日子，由於小妹近日開始膽粗粗學人整餅，所以我就的起心肝整我人生第一個親手製嘅生日蛋糕送給老豆。你哋話掂唔掂呢?

嘻~~我自己都覺得幾好食架...... ^_^

藍莓酸忌廉鬆餅

2006-05-27T12:26:00.000+08:00

昨晚發現雪櫃內用剩的酸忌廉到期啦，所以嗱嗱林搵吓有無用酸忌廉製作嘅食譜，就係咁就跟食譜整個依6個藍莓酸忌廉鬆餅。起初焗好時鬆餅都升高至紙杯邊以上，但出爐後鬆餅就"塔"下，就係你睇到以下相中的情況。雖然賣相差少少，但味道仍算不錯呀!

開始整餅差不多3個月啦~~

2006-05-26T14:47:00.000+08:00

家中增添了一個免費得來的焗爐大概已經有3個月啦，期間都整過好幾個海綿蛋糕、曲奇、麵包和朱古力波波(因為朱古力係我嘅最愛，所以絕大部份製成品都係朱古力味~~)。前3樣的製成品，基本上都整得有板有眼，總算食得入口，見得吓人，但朱古力波波整咗2次都係失敗，雖然可以食得入口，但賣相同"x崎"日本麵包店賣的葡式朱古力波如終差好遠。真係唔明白，跟足食譜做但始終都係做唔到，不過我唔會放棄嘅，過一陣我就會再試過，依家睇住我之前做嘅雙重朱古力曲奇先啦。

依d係我響4月13日晚整嘅雙重朱古力曲奇......味道當然......^_^

Shirley's Blog 面世啦!

2006-05-26T11:37:00.000+08:00

想擁有自己的Blog已經有一段時間啦，今日終於的起心肝整咗依個Blog，希望大家多d發表意見，有時間就入來睇吓有無嘢可以交流吓啦!