悠閒日誌

希望每個人進入Shirley's Blog後就好像走入了一個平靜、開心、自由自在的悠閒世界。

January 19, 2007

Shirleyyau Y!BLOG正式啟用

特別通告:

我響YAHOO開嘅BLOG已正式開始運作啦,有時間就過去坐吓啦,不過唔好唔記得依個BLOG呀,兩個BLOG會同時運作架...^_^

http://hk.myblog.yahoo.com/jw!2Kyn8CyFGA6sAWqLtw--

January 18, 2007

賭場小插曲

1月14日下午在亞堅家與DIY友短聚後,隨即搭車到中港城搭船過澳門出席朋友的婚宴。既然來到澳門,當然不少得到賭場玩玩,15號下午響漁人碼頭食過lunch後,便行過隔鄰嘅金沙賭場碰碰運氣,當然只係小賭,賭得大我都唔捨得啦...^_^

玩咗大約4個鐘頭,大約輸咗1000大元,按照計劃我同老公打算在賭場留到晚上8點就離開行過去碼頭搭8:30嘅新渡輪返港,但我在臨離開前究發生咗一段小插曲,令我搭唔到8:30班船。事緣,玩最後一鋪大細時,其中有一個女人唔記得自己落咗200元注買小,在開骰盅前佢將其中一個已放到買小嘅100蚊籌碼轉到買大,結果當然係開小啦,到荷官賠錢時,100蚊同200蚊嘅落注人數既然唔啱數,有4個人買咗100蚊,其中1個就係我,但檯上只有落注100蚊嘅就只得3個,荷官即時通知經理,經理即時與上面控制室聯絡,再翻查cctv,所有籌碼和賭枱都唔郁得。當時已經係8:05分,我已第一時間同個女經理講我要趕住搭船,但佢哋搞搞一下都已經8:15,我都已經趕唔切啦,所以我要求賭場賠償我2張船飛嘅損失。女經理原本死都話唔得,後來我要求同佢上司講,佢個葡籍女上司起初都話冇得賠,但最後因為佢敵唔過我嘅堅持,最後佢同佢嘅葡籍男上司講,依位男士終於答應幫我出番2張9:30嘅船飛畀我作賠償,而且仲係TurboJet,價值比新渡輪貴。

哈哈哈...今次雖然輸咗錢,但可以響金沙攞到2張船飛,我都當係贏咗架啦...^_^

遲來的報道 : 14/1DIY友BBQ聚會

期待已久的DIY友BBQ聚會終於來臨,由於第一次跟大班網上認識同時又熱愛自家整餅嘅朋友見面,當然心情有d緊張,但因為我當日下午要搭船過澳門出席朋友嘅婚宴,所以只能跟大家來個1-2小時嘅短聚。雖然食唔到大家精心炮製的各種BBQ美食,但有機會食到亞堅整的Tenderness、蛙蛙和綠萼等人合力製作嘅無花果合桃蕎麥包、y.c.帶來嘅日式沙律,以及achan整嘅醎牛脷,差d唔記得仲有on_on煲嘅白果腐竹糖水,總算有少少口福。

第一次見面,當然唔少得見面禮啦,"得意薑餅人"就係我為大家準備嘅見面禮,人人有份,永不落空。另外,我又整咗藍莓乾燕麥曲奇畀大家試吓。


藍莓乾燕麥曲奇送抵亞堅家後,放在靚靚銀碟上,再加上白板、竹簾和伯爵茶嘅襯托,即時靚晒...


到亞堅家第一樣食到嘅美食就係亞堅整嘅Tenderness,第一次食這款西式小吃,唔...好味道,真係好想再食呀...


蛙蛙、綠萼、maymok、藍藍及亞堅即場合力製作嘅無花果合桃蕎麥包,真係好香軟、好好味呀...所以我已經劫走咗一個包包啦...heheheheeeee


期待下一次嘅聚會~~

January 04, 2007

2007年開爐作--Classic Chocolate Gateau

依個古典朱古力蛋糕係跟亞堅嘅食譜整,其實早幾個月前已經買咗黑朱古力打算整依款蛋糕,只不過一直都未有動手做。第一次整依款蛋糕,適逢2007年元旦,整嘅時候真係好緊張、好小心,因為怕今年一開爐就失手,唔好意頭嘛...^_^ 不過好彩最後都成功做到,我唯一唔滿意嘅係,蛋糕中間下陷程度不足,以致整個蛋糕嘅賣相唔係太靚。至於味道方面...唔...好香渨嘅朱古力呀,少少苦苦哋,好~~好~~味~~呀~~~~

January 02, 2007

2006年收爐作--"堅版"薑餅人曲奇

我嘅DIY整餅生涯由2006年3月左右開始,經過咗大半年嘅實習,雖然整包餅嘅技術仍屬幼稚園BB班階段,尚有很多很多改進空間,但從中我卻得到唔少滿足感,不單只可以為伴侶和家人親自製作包餅嘅關係,同時亦因為認識到你哋一班DIY友,令我響整包餅嘅路途上得到不少支持和鼓勵,亦因為認識咗你哋而令我獲益良多。在這我要同你哋講聲:多謝!

2006年我嘅最後製作係"堅版"薑餅人曲奇,今次係跟亞堅嘅食譜製作,製成品和較早前做的明顯不同,今次焗出來的曲奇較脆、較硬、顏色較啡黑、味道較香濃,同時亦因為得到亞堅的指點,所以用咗蛋白糖霜做裝飾,今次真係睇得又食得...^_^

December 20, 2006

再來"靚靚得意版"薑餅人

昨晚放工返屋企食完飯又再焗薑餅人,連續3晚都係用同一個麵糰來焗,大前日焗出來嘅係"失敗版",前日焗出來嘅係"靚版",昨日焗出來嘅就加更係"靚靚得意版",完來幫薑餅人扮靚裝身係會上癮架,我昨晚幫d人仔扮靚扮到都唔知時間過得咁快,望下個鐘已經凌晨1點啦,真係快活不知時日過。不過我都好滿意昨晚為薑餅人創作嘅新形象,其中仲有一家四口共渡歡樂聖誕添...^_^

祝大家聖誕節快樂!!


一家四口去睇聖誕燈飾啦~~

December 19, 2006

裝身後的"靚版"薑餅人

前日整薑餅人時留咗2/3麵糰響雪櫃留番昨晚放工返屋企後再焗,汲取前日焗薑餅人嘅經驗,雖然昨晚和前日所造嘅薑餅人都係來自同一麵糰,但昨晚我特別有小心睇火,所以焗出來的薑餅人顏色金黃,恰到好處,見到d人仔顏色咁靚,自然我都有心情為佢哋扮靚靚。

你哋睇吓,經過用糖霜裝身後嘅薑餅人真係靚咗好多呀,靚到我都唔捨得食添...^_^


不過,唔知係咪我調較糖霜時嘅水份太少,所以糖霜加水後比較杰,我只可以好似整泥膠咁,用手將糖霜搓好後才放上薑餅人身上。我都唔知咁整啱唔啱架,我只知道最後可以成功為人仔扮靚靚,咁我就好開心啦...^_^

December 18, 2006

薑餅人(失敗版)

昨日第一次整薑餅人,不過由於焗嘅時候已睇到薑餅人仔有少少溶化跡象,可能牛油份量較多(250g),加上無睇火以致焗到表面顏色偏深,食落口感好鬆脆,一d都唔硬,所以我覺得今次算係失敗之作。

材料: 無鹽牛油 225g / 蛋 1隻 / 幼黃糖 100g / 麵粉 250g / 梳打粉 1茶匙 / 鹽 0.25茶匙 / 泡打粉 0.5茶匙 / 薑粉 2.5茶匙 / 玉桂粉 0.5茶匙 / 豆寇粉 0.5茶匙 / 雲呢嗱香油 1.5茶匙

因為焗出來的效果唔理想,所以我都無心機再為薑餅人仔加任何裝飾~~

December 12, 2006

monchhichi陪你過一個白色聖誕

聖誕節就到啦,如果你同我一樣唔可以親身響雪地上過一個白色聖誕,不如去海港城join埋monchhichi一邊滑雪一邊慶祝聖誕,下年有機會再同自己嘅honey一齊飛出香港過一個白色聖誕啦。

帶齊裝備可以出發啦~~

December 08, 2006

熱情鬆餅

由於一大碗熱情果汁放咗響雪櫃差唔多2星期啦,其實都唔知d熱情果汁放唔放得咁耐,所以昨晚用咗一半來整熱情鬆餅。今次焗出來嘅效果比之前用熱情果汁來整小蛋糕嘅效果好,不過就唔及小蛋糕香,同時食落亦冇小蛋糕咁有少少酸酸甜甜嘅味道,等我下次整鬆餅時用多d熱情果汁代替牛奶嘅份量,睇吓焗出來會唔會香d好味d。

熱情鬆餅(8個中型紙杯份量)

材料:
麵粉 270g
糖 100g
泡打粉 3tsp
鹽 3/8tsp
蛋 3隻
牛油溶液 82g
牛奶 75g
熱情果汁 100g
雲喱拿香油 1tsp

做法:將蛋打散後加入牛油溶液、牛奶、熱情果汁及雲喱拿香油攪匀,然後拌入已篩過嘅麵粉、糖、泡打粉及鹽,將麵糊倒入紙杯,再放入已預熱焗爐用200度焗23分鐘,焗好將鬆餅留在焗爐內5分鐘後才取出放涼。



( 哎呀...我打打吓個食譜才發現,原來我唔記得將牛奶同熱情果汁嘅份量加大,因為原食譜係用2隻蛋嘅份量,但我就3隻蛋份量,其他所有材料我都記得加大,唯獨牛奶同熱情果汁嘅份量就唔記得加大,唔怪得拌匀所有材料後嘅麵糊比較"杰"啦。真係失策啦~~~ )

December 06, 2006

化痰止啖--龍利葉石黃皮蚌花瘦肉湯

雖然星期一煲咗花旗參無花果豬展湯,但因為老公依兩日有痰又有兩聲咳,唔知花旗參湯啱唔啱佢飲,所以寧願煲過d化痰止咳湯水畀佢飲。

響網上搵咗資料後,原本打算煲龍利葉無花果瘦肉湯,所以放工就去咗花墟嗰間財記買新鮮龍利葉。點知去到見到除咗龍利葉外,原來仲有其他幾種材料都有化痰止咳功效,鋪頭阿姐又話可以幾種材料一齊煲,所以我最後就聽阿姐話用$20買咗3種材料,包括新鮮龍利葉、石黃皮和新鮮蚌花,3種材料係阿姐隨意執,故當時我都唔知究竟3種材料各自嘅份量係幾多。不過,我返屋企都有分開3種材料磅過,詳情如下:

龍利葉石黃皮蚌花瘦肉湯
材料:新鮮龍利葉 92g / 新鮮蚌花 92g / 石黃皮 174g / 蜜棗 8粒 / 南北杏 10g / 瘦肉 $15 / 水 2.5L


右邊一粒粒嘅就係石黃皮,而左邊紫紅色好似朵花咁嘅就當然係新鮮蚌花啦。

花旗參無花果豬展湯

因為買咗個真空煲,所以令到我更加的起心肝煲多d湯水畀自己同老公滋潤下。今個星期一就煲咗依款簡單易煲嘅秋冬滋潤湯水-花旗參無花果豬展湯。

材料: 花旗參 2湯匙 / 無花果 5粒 / 豬展 $20 / 水 2.5L

做法: 先洗淨所有材料,花旗參用半碗水浸15分鐘,豬展用熱水拖一拖,煲滾2.5L水後放入所有材料,浸花旗參嘅水亦一齊放入煲內,再滾30分鐘後離火,放入真空煲內,因用真空煲不能用大火,所以全程用中火煲。到飲時從真空煲取出內煲,稍加熱及加入適量鹽便可飲用。

由於晚上11點左右才放入真空煲,到第二朝起床煲湯已經煲好,而且仲係熱,所以無需加熱就已經可以飲。真空煲真係好用呀...^_^

December 01, 2006

買真空煲送保暖杯及手製陶瓷煲

昨日先施開始首天VIP減價,所以放工就去咗西九龍中心間先施睇吓有無筍嘢執,結果買咗差唔多成千蚊嘢,最貴就係依個$888嘅Thermos 4.5L真空煲,依家買仲送一個直徑約7吋、高4.5吋嘅手製陶瓷煲及0.5L保暖杯。其實之前好耐都想買個真空煲,主要想煲多d湯飲,今次減價又有嘢送,所以就即刻買返屋企...^_^

November 29, 2006

清新感覺~~熱情小蛋糕

終於用咗d皺皮熱情果來整蛋糕啦,昨晚用咗2個熱情果取汁(約45g)來整小蛋糕,可能熱情果放耐咗真係會甜d,一切開已經傳來一股香噴噴嘅果香,香中又帶少少酸,酸酸甜甜嘅感覺真係好特別喎,難怪咁多diy友都對熱情果情有獨鍾啦。

唔...蛋糕賣相雖然差咗少少,但食落個蛋糕軟綿綿,又有種香甜清新感覺,真係好feel呀~~~

November 27, 2006

跳完Funky Dance成個人散晒啦~~

昨日去咗學人跳funky dance,第一次試堂跳到唔知似乜,但係為咗做多d運動,鍛鍊體質兼修身,辛苦d都要啦。Funky Dance嘅運動量真係好大,跳完1.5小時後,我由內至外全身濕透,未跳完都已經覺到部份肌肉有扯緊嘅感覺。由於我第一次跳,加上好耐無做運動同埋並無舞蹈底子,所以昨日試堂時很多舞步和動作都跟唔上,不過導師話個個新同學都係咁,初初跳時會唔知自己跳乜,但跳多幾堂就可以跟得上。我昨日跳完已經攰到唔係好想郁,今日訓醒時就更加周身肌肉酸痛,簡直唔想起身返工。雖然係咁,但為咗可以有多d運動同修身,我之後會繼續跳funky dance嘅,將來修身成功再話曲大家知啦...^_^

跳完funky dance返到屋企已經好攰,但自己又手痕想整餅,所以夜晚就整咗簡簡單單嘅雙層朱古力鬆餅來慰勞自己。

皺皮熱情果

上星期四lunch time響界限街近太子地鐵站一個蔬果檔買咗$20熱情果,當時檔口老闆教我揀d較深色嘅,買返屋企後再放2-3日等佢皺皮後就會較甜較好食。果然,買返屋企後放咗3日,果香越來越濃,果皮亦一日比一日皺,相信依2日都係時候用來整熱情果蛋糕啦。由於未買雪芳蛋糕模,所以我只會整熱情果鬆餅,整好再post上來畀大家睇下啦...^_^

較酸的新鮮熱情果(11月23日)


較甜的皺皮熱情果(11月26日)

November 22, 2006

秋冬滋潤湯水--雪梨茶

近排天氣轉涼,而且有時都幾乾燥,早排每日起床都覺得比較乾,仲好似有少少流鼻血咁,響依d咁嘅天氣最好緊係煲返d滋潤嘅雪梨茶飲下啦。咪以為我好有經驗呀,未結婚前同阿媽住時都可以經常飲到阿媽煲嘅雪梨茶,不過結婚後,做咗"無飯主婦"後,今次只係第一次煲咋,雖然煲雪梨茶並唔複雜,但由於第一次煲,諗住煲多少少可以留返幾日飲,所以落多咗d水(7個天津梨+15杯水),結果煲雪梨水略為清淡咗d,不過飲飲下又覺得幾有雪梨味喎...^_^

真係好啦,有得飲又有得食。

November 16, 2006

的起心肝煲靚湯~~

近排天氣轉涼,濕度偏低,以致皮膚較乾燥,係時候煲返D秋冬湯水補返下。繼日前煲過猴頭菇鯊魚骨湯後(係以前買咗未煲嘅湯包黎架...heheheeee),昨晚就煲咗沙參玉竹鮑魚螺片湯,依款湯水完全係我個人創作,將家中餘下嘅煲湯村枓混合而成。其實我都唔知依d材料配搭啱唔啱架,不過煲咗2個半鐘後試味,原來個湯都好清、好鮮甜喎,大家不妨試試...^_^

材料:沙參 40g / 玉竹 40g / 碎鮑片 15g / 螺片 2塊(66g) / 圓肉 15g / 豬展 半斤 / 水 15杯




另外,由於昨晚只得自己一個"食自己",所以除咗煲湯外,我就只係煮咗個即食麵填飽個肚就算。過往我只會食兩款即食麵:出前一丁及公仔麵,不過我昨晚就試咗新嘢,就係出前一丁中華生麵,依款麵強調"不經油炸",故吸引我買來試吓。食落都幾好味喎,麵身幾爽,感覺幾健康。
(蛙蛙&八八,現誠意推介你哋試吓...^_^)


出前一丁中華生麵-蠔汁鮑魚味

November 06, 2006

豆腐紅豆芝士蛋糕

剛過去嘅星期日整咗我人生第三次為他人整嘅生日蛋糕,由於今次嘅主角係我舅公,所以我打算整個較健康、適合老人家食嘅生日蛋糕畀佢。依款蛋糕由4層組成,由上而下順序係豆腐芝士、紅豆芝士、清蛋糕及碎餅底。


由於第一次整依款蛋糕,所以之前我響網上搵咗好多資料,再根據網友提供嘅心得,決定用街市賣嘅布包豆腐做豆腐芝士餡。不過唔知係我技術差定係做嘅過程出錯,做出來嘅豆腐芝士餡明顯呈細粒狀,外表見唔夠平滑,食落亦唔夠幼滑。不過好彩嘅係,反應都算唔錯,我表舅父仲話得喎,好食喎,佢仲留咗件蛋糕做佢第二朝嘅早餐添。

貓貓:你訓覺個樣好得意呀!

你睇下依兩隻貓貓訓覺個樣係咪好可愛呢!好似一面訓一面笑咁,唔知係咪因為訓得好舒服呢。真係好得意呀...^_^


大家唔好誤會,依隻唔係大頭貓,只係拍攝角度影響咋。

November 01, 2006

遲來的"Hello Kitty冰皮月餅"

仲記得7仔響中秋前曾經賣過一set DIY Hello Kitty冰皮月餅預伴粉連膠模嗎? 我做facial間美容院嘅幾個美容師話買咗番屋企都整唔到,加上佢哋話想再食我整嘅冰皮月餅,所以其中一個美容師就借咗個模畀我,叫我整D Hello Kitty冰皮月餅畀佢哋食。

雖然中秋節已經過咗3個多星期,不過正所謂"十月都係拜年時",所以只要你想食而自己又可以整到的話,咁就幾時都可以食月餅啦...^_^

October 26, 2006

簡單易做--蒸釀冬菇

任何菌類我都非常鍾意食,小時候每逢過節,媽咪總會炆一大煲冬菇,因為知道我鍾意食丫嘛...^_^

前日響超市買咗兩盒鮮冬菇,昨晚響街市買咗d鯪魚肉返屋企整釀冬菇。我記得以前媽咪曾經用蒸嘅方法整依味餸,蒸完d冬菇再淋少少豉油熟油響面,真係好好食架。所以昨晚我照樣用蒸嘅方法整魚肉釀冬菇,不過蒸熟後就無淋上豉油熟油,原來咁樣都已經好香好好食,大家都試吓啦...

October 20, 2006

第一次整香草焗魚扒

昨晚得自己一個食飯,所以諗住整d簡單又健康嘅菜色,順便煮可少少可以今日帶返公司做午餐。由於平時少吃魚,加上好想試吓用焗嘅方法來煮,所以響凍肉鋪買咗一塊南美金鱈魚扒,返屋企解凍後加少少鹽和檸檬汁做醃料,之後將少少乾香草放響魚塊上,過一陣再將魚塊略煎以取色,之後用錫紙包好放入已預熱220度焗爐焗15分鐘就得啦...唔...魚塊未出焗爐時已聞到好香嘅魚味,食落味道亦唔錯呀...^_^


同場加影秀珍菇炒翠玉瓜...簡單易做又健康...唔...好味道...

October 16, 2006

有snoopy之稱嘅"比高犬"

平時經過深水埗一間寵物店時,間中都會見到幾隻初生比高BB好可愛咁堆埋一齊訓覺,每次見到我同老公都會停下來睇一陣才走。最近又見到店內有4-5隻初生比高BB,上星期六經過時只剩下3隻,同店員姐姐傾傾下才知道原來其中2隻比高仔都已經有新主人啦,遲d就會跟主人返屋企玩,而另外的一隻比高女則仍待新主人嘅出現。於是我老公問店員姐姐可唔可以拿隻比高女出來睇下,店員姐姐話:當然可以啦。比高真係好活潑、好可愛、好得人鍾意,我哋後來仲幫佢影咗幾張肉照,你哋話佢係咪好得意呢...^_^

October 13, 2006

又到咗減肥嘅時候啦~~

近日見到幾個網友都話減肥,佢哋主要透過控制進食嘅種類來減磅,我見佢哋嘅餐單都係無澱粉質同埋唔食甜品,生果亦係盡量避免,就算食都只係食西柚。昨晚我特別買咗一條茄子和一個黃椒,返屋企諗咗好耐都唔知點煮好,最後就好求其咁用咗一茶匙韓式醃醬來炒茄子和黃椒,原來味道都唔錯喎。跟住我再將老公昨日下午食剩嘅幾塊叉燒切粒,再加一隻蛋同之前整蛋糕時剩下嘅一個蛋白混合,結果就整咗一小碟叉燒炒蛋,依兩樣餸就作為我今日嘅午餐啦...^_^

韓式醃醬炒黃椒茄子+叉燒炒蛋